Орусиянын Борбордук аскердик округунун командиринин орун басары, генерал-майор Рустам Миннекаев Кыргызстандын аймагындагы “Кант” авиабазасын бекемдөө кандай жүрүп жатканын айтып берди.
Генерал-майор авиабаза абадан коргонуу системалары менен бекемделерин “Интерфакс” агенттигине берген маегинде билдирди.
“Пландар азырынча аткарыла элек, бирок процессте”, – деген Миннекаев.
Эске салсак, биринчи жолу Орусиянын Кыргызстандагы авиабазасы чыңдалганы жөнүндө Орусиянын коргоо министринин орун басары Николай Панков 2020-жылдын 11-февралында билдирген. Февраль айында “Кант” авиабазасына чалгындоочу-дрондор жеткирилген.
Учурда авиабазада чабуулчу Су-25 учактар жана Ми-8 тик учактары бар.
Белгилей кетсек, Ооганстандагы кырдаалга байланыштуу Орусиянын Тажикстандагы 201 – аскердик базасы дагы бекемделүүдө.
